Mudcat Café Message Lyrics & Knowledge Personal Pages Record Shop Auction Links Radio & Media Kids Membership Help
The Mudcat Cafeawe



User Name Thread Name Subject Posted
Drumshanty Lyr Req: drumdelgie revisited?/Drumdelgie Nae Mair (5) Lyr Add: DRUMDELGIE NAE MAIR (Middleton/Murison... 11 Nov 10


DRUMDELGIE NAE MAIR (words: Ian Middleton; tune Geordie Murison/Steve Inglis)

There's a fairmtoon up in Cyarnie, weel kent in bothy sang
A place that's famed the country ower, nae matter far ye gang
The fairmer o' yon muckle toon retired t tak his ease
And there's half o't noo in set aside, the ither half's in trees

There's nae a fee'd man t be seen, the parks are bare o' nowt
The grun's a' cryin' oot for crap, wi naebody there tae grou't
The logic or the reason for't is hard t unnerstan
Bit the waste wid gar a body greet that's thirled tae the land

Foo money men, in days lang syne, wi dour unbendin will
Hid dargit at it, months on eyne, t rive it fae the hill?
An kyaaved t shift the thraan tree stumps, and eyneless cyarns o steen
Wi miles o man-made drains t lay afore the job wis deen

Nae modern-day machinery then, t ease the waichty birn
Nor yet a sympathetic lug for ony greet or girn
Twis tire, and jist fa tee again, wi mony's a sypin sark
An men, groun aul afore their time, sair rackit wi the wark

Come time, the place began t thrive, wi aye mair hill teen in
An seen progressed t sic a size, it left the rest ahin
An fin they a were yokit, aye, an deckit oot wi pride
The show o horse wis foremaist in the hale o Diveronside

Drumdelgie's praise, in bothy lays, is gey ill-fittin noo
Wi a its grun, sae sairly won, forsaken b the ploo
The wark his been a waste o time, the foresicht a in vain
As the reets o yon fast-growin trees gyang doon throu ivery drain

Far eence sae mony acres steed, a stookit, ra on ra
The dockins an the tansies thrive, t mark its sad doonfa
It's ayont a comprehension, foo they justify a scheme
Far sae muckle lan lies idle, wi sae mony bellies teem

Gyang oot some day, roon Cyarnie way, an cast yer ee aroon
The legalised distruction o Strathbogie's biggest toon
An maybe, in the silence, as ye contemplate the soss
Ye'll hear the soon o ghostly feet gyan clatterin through the closs

Syne, bid "fareweel Drumdelgie" as ye turn t come awa
Aye "fare-ye-weel Drumdelgie, an yer unca kirn an a"
Ye've been immortalised in sang, since days o horse an cairt
An t see yer sad decline the day, wid braak a body's hairt!

(Makes me weep every time Geordie Murison sings it...)


Post to this Thread -

Back to the Main Forum Page

By clicking on the User Name, you will requery the forum for that user. You will see everything that he or she has posted with that Mudcat name.

By clicking on the Thread Name, you will be sent to the Forum on that thread as if you selected it from the main Mudcat Forum page.

By clicking on the Subject, you will also go to the thread as if you selected it from the original Forum page, but also go directly to that particular message.

By clicking on the Date (Posted), you will dig out every message posted that day.

Try it all, you will see.